Հայաստանի բնակչութեան 29.8%-ը աղքատ է, 2%-ը` ծայրայեղ աղքատ:

ՀՀ ազգային վիճակագրական ծառայութիւնը հրապարակած է «Հայաստանի ընկերային պատկերը եւ աղքատութիւնը» զեկոյցը, ուր ամփոփ ներկայացուած է Հայաստանի աղքատութեան մակարդակի գնահատականը եւ ընկերային վիճակի ու կենսամակարդակի փոփոխութիւնները 2008-2015 թուականներու ժամանակահատուածին մէջ: Ասիկա տասնեօթերորդ հրապարակումն է ՀՀ ԱՎԾ-ի ամենամեայ համանուն զեկոյցներու շարքին:

Ըստ զեկոյցին, 2015-ին Հայաստանի բնակչութեան 2%-ը եղած է ծայրայեղ աղքատ, 10.4%-ը` շատ աղքատ, 29.8%-ը` աղքատ: Այսինքն, երկրի իւրաքանչիւր 10 բնակիչէն մօտ 3-ը ամսական 41.698 ՀՀ դրամ վերին աղքատութեան գիծէն ցած կը գտնուի: 2014-ի համեմատ, երբ աղքատութեան մակարդակը 30.0% էր, արձանագրուած է աղքատութեան մակարդակի նուազում 0,2 տոկոսային կէտով: 2015-ին աղքատներու ընդհանուր թիւը կազմած է մօտ 900 հազար մարդ, անոնցմէ շատ աղքատներու թիւը` մօտ 310 հազար (ներառեալ 60 հազար ծայրայեղ աղքատները):

2015-ին աղքատութեան վերին եւ ստորին, ինչպէս նաեւ ծայրայեղ գիծերը` ըստ սպառման, արտայայտուած մէկ չափահաս անձի հաշիւով, մէկ ամսուայ համար եղած է, համապատասխանաբար, 41.698 դրամ (կամ 87.2 ԱՄՆ տոլար) , 34.234 դրամ (կամ 71.6 ԱՄՆ տոլար) եւ 24.109 դրամ (կամ 50.4 ԱՄՆ տոլար):

2014-ին Հայաստանի բնակչութեան 2.3%-ը եղած է ծայրայեղ աղքատ, 10.9%-ը` շատ աղքատ, 30%-ը` աղքատ: Զեկոյցին մէջ նաեւ ներկայացուած են աղքատութեան 2008 թուականի ցուցանիշները, որոնց համաձայն Հայաստանի բնակչութեան 1.6%-ը եղած է ծայրայեղ աղքատ, 12.6%-ը` շատ աղքատ, 27.6%-ը` աղքատ:

Կը ստացուի, որ 2015 թուականին ծայրայեղ աղքատութեան մակարդակը դեռ կը գերազանցէ 2008-ի մակարդակը 0.4 տոկոսային կէտով, իսկ աղքատութեան վերին գիծին վրայ` աղքատութեան մակարդակը 2.2 տոկոսային կէտով բարձր էր 2008-ի համեմատ: Միաժամանակ ճգնաժամէն ետք շատ աղքատներու մակարդակը, 2008-ի համեմատ, իջած է 2.2 տոկոսային կէտով: